काठमाडौँ । नेपाली कांग्रेसले केन्द्रीय कार्य सम्पादन समितिको बैठक बोलाएको छ । राष्ट्रपति उम्मेदवारबारे औपचारिक टुंगो लगाउन कांग्रेसले केन्द्रीय कार्यसम्पादन समिति बैठक बोलाएको हो ।
कांग्रेसले शनिबार विहान साढे ८ बजेका लागि कार्यसम्पादन समितिको बैठक बोलाएको कांग्रेस मुख्यसचिव कृष्णप्रसाद पौडेलले जानकारी दिए । शुक्रबार विज्ञप्ति जारी गर्दै पार्टी केन्द्रिय कार्यालय सानेपामा बस्ने बैठकमा केन्द्रीय कार्यसम्पादन समितिका पदाधिकारी र सदस्यहरुलाई आमन्त्रण गरेका छन् ।
बैठकको एजेन्डाबारे विज्ञप्तिमा उल्लेख गरिएको छैन । तर राष्ट्रपतिबारे औपचारिक टुंगो केन्द्रीय कार्य सम्पादन समिति बैठकले लगाउने कांग्रेस नेताहरुले बताएका छन् । वरिष्ठ नेता रामचन्द्र पौडेल र पूर्वमहामन्त्री कृष्णप्रसाद सिटौलाले राष्ट्रपति उम्मेदवार हुन चासो देखाएका छन् । यी दुईमध्ये एक जनालाई उम्मेदवार बनाउने कांग्रेसको तयारी छ ।
