इजरायली हवाई हमलामा गाजा स्ट्रीपमा एक प्यालेस्टिनी लडाकू समूहका शीर्ष कमान्डरसहित कम्तीमा १० जना मारिएका छन् । स्थानीय स्वास्थ्य अधिकारीहरूका अनुसार मृत्यु हुनेमध्ये एकजना बालिकासमेत छिन् र अन्य दर्जनौँ घाइते भएका छन् ।
इजरायलका प्रधानमन्त्रीले त्यस्तो कारबाही प्यालेस्टिनी इस्लामिक जिहाद (पीआईजे)बाट एउटा तत्कालको जोखिम देखिएपछि उक्त कारबाही गरिएको बताएका छन् । यस साताको सुरुमा पीआईजेका एकजना सदस्य पक्राउ परेका थिए । सुरुवाती जवाफका रूपमा पीआईजेले इजरायलतर्फ एकसय भन्दा धेरै रकेटहरू प्रहार गरेको छ ।
ती धेरैलाई इजरायलको आइरन डोम क्षेप्यास्त्र प्रतिरक्षा प्रणालीले पहिचान गर्दै निष्क्रिय पारेको छ । कैयौँ इजरायली सहरहरूमा त्यसको जनाउ दिनेगरी साइरनहरू बजेका थिए।
