मणिपुर । भारतको मणिपुर राज्यमा भएको हिंसामा मृत्यु हुनेहरुको संख्या ५४ पुगेको छ । समाचार एजेन्सी पीटीआईको रिपोर्ट अनुसार यो आधिकारिक तथ्याङ्क हो तर वास्तविक मृत्युको संख्या यो भन्दा बढी हुन सक्छ ।
शनिबार देखि इम्फाल उपत्यकामा जनजीवन पुनः ट्रयाकमा फर्किएको देखिन्छ । पसल र बजार खुलेका छन् भने सडकमा सवारीसाधनहरू देखिएका छन् । यद्यपि, सबै प्रमुख सडक र स्थानहरूमा द्रुत कार्य बल र केन्द्रीय प्रहरी बलको बाक्लो उपस्थिति छ।
अधिकारीहरुका अनुसार मृत्यु भएका ५४ जना मध्ये १६ जनाको शव चुराचन्दपुर जिल्लाको अस्पतालको शवगृहमा राखिएको छ भने १५ जनाको शव इम्फाल पूर्व जिल्लाको जवाहरलाल नेहरु चिकित्सा विज्ञान प्रतिष्ठानमा राखिएको छ । इम्फाल पश्चिमको क्षेत्रीय चिकित्सा विज्ञान संस्थान अस्पतालमा २३ वटा शव राखिएको छ ।
चुराचन्दपुर जिल्लामा शुक्रबार राति भएको दुई छुट्टाछुट्टै भिडन्तमा भारतीय रिजर्भ बटालियनका दुई सैनिक घाइते भए भने पाँच अतिवादीको मृत्यु भएको प्रहरीले जनाएको छ । रक्षा मन्त्रालयका प्रवक्ताका अनुसार हिंसा प्रभावित क्षेत्रबाट अहिलेसम्म १३ हजार मानिसलाई सुरक्षित स्थानमा सारिएको छ ।
तीमध्ये केहीलाई सेनाको शिविरमा पनि राखिएको छ । चुराचन्दपुर, मोरे, काक्चिङ र काङपोकपी जिल्लाको अवस्था नियन्त्रणमा आएको भारतिय सेनाले जनाएको छ ।
