काठमाडौं । सामाजिक संजालको दुरूपयोग गरी युवतीलाई दुःख हैरानी दिई चरित्रहत्या गरेको अभियोगमा रोल्पा सुनिल स्मृति गाउँपालिका–५ घर भएका २२ वर्षीय ओमप्रकाश महरालाई सोमबार प्रहरीले पक्राउ गरेको छ ।
पीडित युवतीको हराएको मोबाइलबाट विभिन्न सामाजिक संजालमा भएका तस्विरमा अश्लील शब्दहरू राखी अपलोड गर्नुका साथै प्रोफाइलबाट आफन्तलाई समेत अपरिचित महिला–पुरुषको यौनजन्य भिडियो पठाई चरित्रहत्या गरेको भन्ने उजुरीको आधारमा साइबर ब्यूरोबाट खटिएको प्रहरीले अनुसन्धानको क्रममा उनको संलग्नता रहेको खुल्न आएपछि उनलाई रोल्पाबाट पक्राउ गरेको प्रहरीले जनाएको छ ।
उनी उपर विद्युतीय कारोबार ऐन,२०६३ अन्तर्गतको कसूरमा जिल्ला अदालत काठमाडौंबाट ७ दिन म्याद थप अनुमति लिई आवश्यक अनुसन्धान भइरहेको प्रहरीले जनाएको छ ।
