काठमाडौँ । नेपाल फ्रान्सको पेरिसमा अर्को वर्ष आयोजना हुने महिला ओलम्पिक फुटबल प्रतियोगिताको एसियाली छनोटको पहिलो चरणबाट बाहिरिएको छ ।
त्रिपुरेश्वरस्थित दशरथ रङ्गशालामा आज भएको समूह सीअन्तर्गत पहिलो चरणको अन्तिम खेलमा नेपाल भियतनामसँग २–० गोलअन्तरले पराजित भएपछि ओलम्पिक छनोटको पहिलो चरणबाटै बाहिरिएको हो ।
भियतनामका लागि दुवै गोल फाम हेई ऐनले गरेकी हुन् । नेपालले सुरुवाती ६ मिनेटभित्र नै दुवै गोल खाएको थियो । खेलकोे पाँचौं मिनेटमा नै भियतनामले नेपालविरुद्ध अग्रता बनाएको हो । भियनामले पाएको कर्नरमा फाम हेई ऐनले हेडमार्फत गोल गरिन् । भियतनामले त्यसको अर्को मिनेटमा नै नेपालविरुद्ध दोस्रो गोल गर्न सफल भयो ।
नेपालको कमजोर रक्षापंक्तिको फाइदा उठाउँदै फाम हेई एनले टोलीका लागि र आफ्नो खेलमा व्यक्तिगत दोस्रो गोल गरिन् । त्यसपछि नेपालले भियतनामविरुद्ध केहि गोल गर्ने मौका बनाएको थियो ।
खेलको २८ औं मिनेटमा नेपाली स्ट्राइकर साबित्रा भण्डारीले भियतनामको दुई डिफेन्डरलाई विट गर्दै गरेको प्रहारलाई भियतनामकी गोलरक्षकले बाहिर पठाइदिइन् । त्यस लगत्तै पाएको कर्नरमा सरुको प्रहार भियतनामकी गोलरक्षकले पन्च गरिन् ।
खेलको ३९ औं मिनेटमा सरु लिम्बुको क्रसमा सावित्रा भण्डारीको प्रहार भियतनाकी गोलरक्षकले सजिल्यै बचाइन् ।त्यस्तै पहिलो हाफमा दुई गोल खाएको नेपालले दोस्रो हाफमा केही राम्रो लय समातेको थियो ।
खेलको ६६ औं मिनेटमा दिपा शाहीको प्रहार पोष्टमा लागेर फर्केको थियो । खेलको ८७ औं सरु लिम्बुले डिबक्सभित्र सावित्रा भण्डारीलाई दिएको पासलाई भियतनामका डिफेन्डरले क्लियर गरिदिए । बुधबार भएको पहिलो खेलमा नेपाल भियतनामसँग ५–१ गोलले पराजित भएको थियो ।
