काठमाडौँ । राष्ट्रिय स्वतन्त्र पार्टी (रास्वपा) केन्द्रीय समितिको बैठक आज (सोमबार) बस्दै छ । बैठक आज बिहान ११ बजे बस्ने रास्वपाका उपाध्यक्ष डोलप्रसाद अर्यालले जानकारी दिए ।
चितवन क्षेत्र नम्बर–२ मा आउँदो वैशाख १० गते हुने उपनिर्वाचनको तयारीलगायत विविध विषयमा छलफल गर्न बैठक बस्न लागिएको हो । पार्टी कार्यालय वसुन्धारामा आजका लागि बोलाइएको बैठकमा फेरिएको राजनीतिक समीकरण, राष्ट्रपति निर्वाचन र चितवन–२ को उपनिर्वाचनबारे छलफल हुने अर्यालले जानकारी दिए ।
गएको पुस १० मा बनेको सातदलीय सत्ता गठबन्धन भत्किएर राष्ट्रपति निर्वाचनमा आठदलीय गठबन्धन बनेको छ । नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ नेतृत्वको सरकार बन्दा रास्वपाले समर्थन गरेकोमा माघ २२ गते सरकारबाट बाहिरिएको थियो । सरकारबाट अहिलेसम्म समर्थन भने फिर्ता लिएको छैन ।
राष्ट्रपतिको निर्वाचनका लागि नेपाली कांग्रेस वा नेकपा (एमाले) का उमेदवारको प्रस्तावक वा समर्थकमा रास्वपा बसेको छैन । केन्द्रीय समिति बैठकबाट उक्त दलले यसबारे स्पष्ट नीति तय गर्ने बताइएको छ ।
