काठमाडौँ । नेकपा एमालेका अध्यक्ष केपी शर्मा ओलीले कांग्रेसले सरकारलाई विश्वासको मत दिँदा सदाशयताबाहेक अरू केही उद्देश्य भए त्यो सफल नहुने बताएका छन् ।
मंगलबार प्रतिनिधिसभाको बैठकमा अध्यक्ष ओलीले कांग्रेसले जाल थाप्न खोजेको हो भने जालमा माछा नपर्ने बताए ।
उनले भने, ‘यो समर्थन, विश्वास जाल र ढोक्सा होइन भने स्वागतयोग्य छ । ढोक्सा हो भने जाल हो भने भन्न चाहन्छु माछा नभएको खोलामा फालेजस्तै हुन्छ । यसभित्र भोलिका निम्ति अरू खालका कुरा सोचिएको छ भने भने ढोक्सा रित्तै हुन्छ ।’
अध्यक्ष ओलीले आफूले संसद विघटन गर्दा कांग्रेसले प्रतिगमन भनेर व्याख्या गरेको भन्दै आपत्ति जनाए । उनले ० १७ साल र २०५१ सालमा संसदले विघटन गरेको होइन र ? भन्दै प्रश्न गरे ।
उनले भने, ‘गुरुजी ! आफूले गरेका कुरा सम्झिनुस् । २०१७ सालमा मैले संसद् विघटन गरेको हो ? २०५१ मा मैले विघटन गरेको हो ? माननीय शेरबहादुरजीले २०५८ साल असारमा संसद् विघटन गरेर असोज १८ र माघ १९ मा पुगेको होइन ? यहाँले होइन पटकपटक संसद् विघटन गरेको ?’
ओलीले अब संसदमा विपक्षी नरहेको भन्दै सरकारका गलत कामको विरोध त सरकारमै सहभागी दलका सांसदहरूले पनि गर्ने बताए ।
