इजरायलले ओमानको तटपारी ट्याङ्करमा भएको आक्रमण ‘इरानको उक्साहट’ को परिणाम भएको आरोप लगाएको छ । कतारमा विश्वकप सुरु हुनुअघि ‘वातावरण बिगार्ने’ उद्देश्यले आक्रमण गरिएको एक इजरायली अधिकारीले बुधबार एएफपीसँग बताएका छन् ।
नाम नबताउने शर्तमा ती अधिकारीले भने, “युक्रेनमा प्रयोग गर्नका लागि रूसलाई इरानले बेचेको वारहेडले सुसज्जित मानवरहित विमान ड्रोन शाहेद १३६ द्वारा ओमनी तटीय क्षेत्रमा ट्याङ्करमाथि आक्रमण भएको भेटिएको छ ।”
इजरायली अधिकारीले इजरायली अर्बपति इदान ओफरको स्वामित्वमा रहेको ट्याङ्करमा भएको आक्रमण इजरायलविरुद्ध ‘इरानी विजय’ भएको भन्ने आरोपलाई अस्वीकार गरेका छन् । “यो इजरायली ट्याङ्कर होइन,” ती अधिकारीले भने ।
इरान र इजरायलबीच लामो समयदेखि शत्रुता रहँदै आएको छ । दुई राष्ट्रबीच ‘छायाँ युद्ध’ का कारण दुबै पक्षका पानीजहाजमाथि आक्रमणको लहर चलेको छ, जसमा उनीहरूले एकअर्कालाई दोष दिने गरेका छन् ।
सन् २०२१ को जुलाई २९ मा ओमानको समुद्री तटबाट उडिरहेको एमभी मर्सर स्ट्रिटमा इजरायलसँग सम्बन्धित ट्याङ्करमा भएको ड्रोन आक्रमणमा एक पूर्व बेलायती सैनिक र एक रोमानियाली नागरिकको मृत्यु भएको थियो ।
