काठमाडौँ । तिहारको अघिल्लो दिनमै फूल सकिएपछि पाल्पामा ग्राहक निराश बनेका छन् । फूल खरिद गर्न बुधबार बिहानै रामपुर नगरपालिका–४ देवीस्थानको फूलबारीमा ग्राहकको ठूलो भीड देखिन्थ्यो ।
यहाँ उत्पादन भएका फूल सकिएपछि धेरै ग्राहक रित्तो हात घर फर्किएका छन् । टीकाको दिनलाई अघिल्लो दिनमै बन्दोबस्त गरेर राख्न फूलबारीमा पुग्दा रित्तो बोटमात्रै रहेको गीता पौडेल बताउँछिन् । “एक हप्ताअघि माग गरे पनि ग्राहकको भीड थेगिनसक्नु हुँदा खाली हात घर फर्कनुपरेको छ”, उनले भनिन्, “व्यावसायिक फूलखेतीमा लगानी गरेर यसलाई विस्तार गर्नुपर्नेछ, रामपुरमा फूलखेतीको प्रवद्र्धन गर्नुपर्ने देखिएको छ ।”
बिहान करिब ७ बजे नै फूलबारीमा पुग्दा सबै बोटमा फूल सकिएको अवस्था रहेको दीपेन्द्र भट्टराईले बताए । फूलको महत्त्व तिहारमा ठूलो रहे पनि गाउँमा फूल अभावको समस्यालाई निराकरण गर्न उत्पादनमा जोड दिनुपर्ने उनी बताउँछन् ।
“फूल लिन भनेर बिहानै उठ्नेबित्तिकै आइयो, एउटा माला पनि पाउन सकिएन, गाउँघरमा कतै पनि फूल छैन, हामी उपभोक्ता फूल अभावमा कृत्रिम माला खरिद गर्न बाध्य हुनुपरेको छ”, उनले भने । तिहारमा दिदीबहिनीले दाजुभाइलाई टीका लगाइदिएपछि गलामा सयपत्री र मखमली फूलको माला लगाउने चलन रहेकाले फूलमालाको विशेष महत्त्व रहन्छ । फूल खरिद गर्न आएका ग्राहक आज बिहानमात्रै करिब तीन सय बढीलाई रित्तै पठाउनुपर्दा दुःख लागेको व्यवसायी दिलबहादुर थापाले बताए ।
उनी भन्छन्, “बिहान म नउठ्दै ४ बजे नै स्थानीय ग्राहक आफैँले फूलबारीमा पसेर सबै फूल टिपेर उज्यालो नहुँदै सकियो, तौल लिन घरमा आउँदा म आफैँ झस्किएँ, बगैँचामा सबै फूल सकिएका छन्, सयौँ ग्राहकलाई रित्तो हात फिर्ता गराउनुपर्दा नमज्जा लागिरहेको छ ।”
बगैँचामा कोपिला लाग्दै गरेका फूल पनि ग्राहकले अभाव भएपछि टिपेर लगेका छन् । गाउँघरमा यस वर्ष कतै फूल फुलेको देखिँदैन । स्थानीय फूलको जात लोप भएकाले पनि अहिले अभाव छ । “देउसीभैलो, विभिन्न सङ्घसंस्थाको आयोजनामा गरिएको दीपावली पूजामा फूल खरिद गर्ने यसपटक धेरै बढे, गाउँमा व्यावसायिक उत्पादन गर्ने कोही छैनन्, तिहारको अघिल्लो दिनमै सबै फूल सकियो”, थापाले भने ।
तिहार सुरु भएदेखि आजसम्म थापाले करिब रु एक लाख ५० हजारको फूलमाला बिक्री गरेका छन् । तीन वर्षदेखि यस व्यवसायको थालनी गरे पनि यसपटक धेरै ग्राहकलाई फूलमालाबिना फर्काउनुपरेकामा दुःख मनाउ गर्दै अर्कोपटक उत्पादन बढाउने थापाको भनाइ छ ।
