गतवर्ष अमेरिकी संसद् भवन क्यापिटल हिलमा भएको दङ्गाको अनुसन्धान गरिरहेको एउटा संसदीय समितिले पूर्वराष्ट्रपति डोनल्ड ट्रम्पलाई सांसदहरूसमक्ष बयान दिनेगरी उपस्थित हुन आदेश दिएको छ ।
समितिले कुनै अमेरिकी राष्ट्रपतिले निर्वाचन उल्ट्याउन गरेको पहिलो र एकमात्र प्रयासको केन्द्रमा तपाईँ रहेको भन्दै उपस्थित हुन आदेश दिएको छ । ट्रम्पका एक वकिलले समितिका सदस्यहरूलाई मापदण्डहरू उल्लङ्घन गरेको आरोप लगाएका छन् ।
पूर्वराष्ट्रपति ट्रम्पले छानबिनको आलोचना गर्दै आफूलाई दिइएको आदेशलाई डेमोक्रेटिक पार्टीकोे शासनको आपतबाट मतदाताको ध्यान अन्यत्र मोड्ने चालको सङ्ज्ञा दिएका छन्। अर्को महिना अमेरिकामा मध्यावधि निर्वाचन हुन लागेको छ ।
संसद्मा उपस्थित हुन दिइएको आदेशको पालना नगरे ट्रम्पले फौजदारी अभियोग खेप्नुपर्ने हुनसक्छ । ट्रम्पलाई जनवरी ६ कमिटी भनेर चिनिने उक्त समितिमा नोभेम्बर ४ भित्र दस्तावेजहरू बुझाउन र नोभेम्बर १४ को दिन वा त्यसको आसपास बयान दिन उपस्थित हुनैपर्ने भनिएको छ ।
यदि ट्रम्पले कङ्ग्रेससामु बयान दिन वा माग गरिएका सामग्रीहरू बुझाउन अस्वीकार गरेमा समितिले उक्त विषय न्याय मन्त्रालयमा पठाउन सक्छ । त्यसो भयो भने उनीविरुद्ध फौजदारी कारबाही प्रक्रिया सुरु हुनसक्छ ।
कङ्ग्रेसको मानहानी गरेको आरोपमा ट्रम्पका एक पूर्वरणनीतिकार स्टीभ ब्याननलाई ६ हजार ५०० अमेरिकी डलर जरिवाना र चार महिनाको जेल सजाय सुनाइएको केही घण्टापछि ट्रम्पलाई बयान दिन उपस्थित हुन पत्र जारी गरिएको हो ।
ब्याननले कङ्ग्रेसमा बयान दिन वा दस्तावेजजहरू उपलब्ध गराउन नमानेपछि उनलाई कारबाही गरिएको थियो।
