धनगढी । कैलालीमा सुन-चाँदीका गहनासहित प्रहरीले दुई जनालाई पक्राउ गरेको छ।
बुधबार मध्याह्न साढे १२ बजे टीकापुर नगरपालिका-१ गणेशपुर शिविरस्थित एक घरबाट दुई जनालाई पक्राउ गरिएको जिल्ला प्रहरी कार्यालय कैलालीले जनाएको छ।
पक्राउ पर्नेमा बाजुरा बुढीगंगा नगरपालिका-१० बस्ने २५ वर्षीय सुजन शाही र कैलाली लम्कीचुहा नगरपालिका-४ बस्ने ३४ वर्षीया रम्भा जैशी छन्।
सुदूरपश्चिम प्रदेश प्रहरी कार्यालय धनगढी, नेपाल प्रदेश प्रहरी कार्यालय महेन्द्रनगर कञ्चनपुर, जिल्ला प्रहरी कार्यालय धनगढी र इलाका प्रहरी कार्यालय टिकापुरबाट संयुक्त टोलीले उनीहरूलाई पक्राउ गरेको हो।
उक्त टोलीले ५० ग्राम चाँदीको सिक्का, हिरा र सुनका औंठी, सिक्री, झुम्का, बिछिया, माला, टप, झुम्कालगायत गरगहना फेला पारेको छ। उनीहरूबाट १३ हजार नगद र एउटा बाइक पनि बरामद गरिएको प्रहरीले जनाएको छ।
उनीहरूलाई इलाका प्रहरी कार्यालय टीकापुरमा राखेर घटनाबारे अनुसन्धान थालिएको प्रहरीको भनाइ छ।
