राष्ट्रसंघ । संयुक्त राष्ट्रसङ्घका महासचिव एन्टोनियो गुटेरेसले सिरियामा राष्ट्रपति बशर अल–असदको शासनको पतनपछि ‘आशाको ज्योति’ रहेको तर अगाडि महत्त्वपूर्ण चुनौतीहरू रहेको चेतावनी दिएका छन् ।
उनले सिरियाको सैन्य पूर्वाधारमा इजरायलले गरेको व्यापक आक्रमण देशको सार्वभौमसत्ताको ‘उल्लङ्घन’ भएको पनि उल्लेख गर्दै तिनीहरूलाई रोक्न आह्वान गरे ।
“मध्यपूर्व धेरै आगोले भष्म भइरहेको छ तर आज सिरियामा आशाको ज्योति छ र त्यो ज्योति निभ्न दिनुहुँदैन”, उनले भने ।
असदको सरकार पतन भएपछि इजरायलले देशको वायु सेना, नौसेना र हतियार भण्डारसहित सैन्य स्थलहरूमा हवाई आक्रमण गर्यो ।
“व्यापक इजरायली हवाई आक्रमण जारी छ । यी सिरियाको सार्वभौमिकता र क्षेत्रीय अखण्डताको उल्लङ्घन हुन् र यसलाई रोक्नुपर्छ”, अमेरिकी विदेशमन्त्री एन्टोनी ब्लिन्केनको अध्यक्षतामा संयुक्त राष्ट्र सुरक्षा परिषद्को बैठकअघि गुटेरेसले भने ।
महासचिव गुटेरेसले अन्तर्राष्ट्रिय समुदायले सिरियामा लागु भएका प्रतिबन्धहरू खुकुलो पार्ने दिशामा पहिलो कदम चाल्ने सम्भावना पनि उठाए ।
“त्यहाँ कम्तिमा पहिलो इशारा हुनुपर्छ – सबै प्रतिबन्धहरू हटाउनका लागि सर्तहरू पूरा नभएसम्म सिरियाली जनतासँग एकता देखाउने पहिलो इशारा”, उनले भने ।
अल–कायदामा निहित र टर्कीद्वारा समर्थित इस्लामवादी एचटिएस आन्दोलनले दमास्कसलाई तीव्र गतिमा आक्रमण गरी कब्जा गर्यो । एचटिएसले वर्षौंको गतिरोधपछि यस महिना शक्तिशाली असदलाई अपदस्थ गरेपछि अल्पसङ्ख्यकहरूको रक्षा गर्ने वाचा गरेको छ ।
तर अन्तर्राष्ट्रिय समुदायहरू सिरिया वा एचटिएसका सदस्यहरूमाथि लगाइएको प्रतिबन्धहरू हटाउन कुनै हतारमा छैनन् । समुदायले नयाँ अधिकारीहरूले कसरी आफ्नो शक्ति प्रयोग गर्छन् भनेर पर्खिरहेका छन् ।
