काठमाडौं । प्रहरीले हुण्डी कारोबारमा संलग्न चार जनालाई काठमाडौंबाट पक्राउ गरेको छ । काठमाडौं महानगरपालिका वडा नम्बर नौ एयरपोर्ट शम्भुमार्गस्थित सडक खण्डमा अवैध रुपमा हुण्डी कारोबार भई रहेको भन्ने विशेष सूचनाको आधारमा मंगलबार प्रहरी वृत्त गौशालाबाट खटिएको टोलीले गाडी जाँच गर्दा ६८ लाख रुपैयाँसहित चार जनालाई पक्राउ गरेको हो ।
पक्राउ पर्नेमा काठमाडौंका राजकुमार माली, नयाँबानेश्वरका वर्ष १८ का आवाद सिंह, झापाका वर्ष २७ का युवराज सुवेदी र झापाकै वर्ष ३२ का प्रवेश कुमार पौडेल छन् । प्रहरीले उनीहरुको साथबाट एउटा कारसहित रकम उल्लेख गरिएका चेक थान ५ र पाँच थान मोबाइल बरामद गरेको जनाएको छ ।
उनीहरुलाई मुलुकी अपराध संहिता २०७४ संसोधित १२५(क) बमोजिम हुण्डी सम्बन्धी कारोबार गर्न नहुने कसूरमा प्रहरी वृत्त गौशालाबाट थप अनुसन्धान भई रहेको जिल्ला प्रहरी परिसर काठमाडौंले जनाएको छ ।
