काठमाडौं । राष्ट्रिय मानव अधिकार आयोगले चितवनबाट पोखरा लैजाने क्रममा राष्ट्रिय स्वतन्त्र पार्टीका सभापति रवि लामिछानेमाथि प्रहरीले दुर्व्यवहार गरेको आरोपबारे प्रहरीसँग सोधपुछ गरेको छ ।
आयोगले सोमबार एआईजी टेकबहादुर तामाङसहित प्रहरी उच्च अधिकारीहरूसँग सोधपुछ गरेको हो । आयोगले घटनाबारे जानकारी दिन पत्र पठाएपछि एआईजी तामाङसहित प्रहरी उच्च अधिकारीहरु पुलचोकस्थित आयोगको कार्यालयमा पुगेका थिए । उनीहरूसँग यस घटनाबारे जानकारी लिइएको आयोग प्रवक्ता टीकाराम पोखरेलले जानकारी दिएका छन् ।
लामिछानेमाथि दुर्व्यवहार भएको भन्दै आयोगमा उजुरी परेको थियो । आयोगको विज्ञप्तिमा भनिएको छ, ‘जानकारी लिने क्रममा आयोगका सदस्य मनोज दुवाडीले कानूनी शासनको प्रत्याभूति सहित स्वच्छ पूर्पक्षको अधिकार र बन्दीका आधारभूत मानव अधिकारलाई सम्मान तथा संरक्षण गर्दै निष्पक्ष र स्वतन्त्र अनुसन्धान हुुनुपर्नेमा आयोगको चासो रहेको बताउनुभयो ।’
यसबारे निष्कर्षमा पुग्नका लागि आइजिपी बसन्तबहादुर कुँवरसँगै थप बुझ्नुपर्ने पनि आयोगले जारी गरेको विज्ञप्तिमा उल्लेख छ । बयानका लागि चितवनबाट पोखरा लैजानेक्रममा प्रहरीले आफूमाथि दुव्र्यवहार गरेको लामिछानेले आइतबार अदालतको इजलासमा बताएका थिए ।
प्रहरीले मादक पदार्थ सेवन गरेको, स्वास्थ्य परीक्षण गर्न आग्रह गर्दासमेत अस्वीकार गरेको लामिछानेले बताएका छन् । तर चितवन प्रहरीले कानुनअनुसार नै रविलाई चितवनबाट पोखरा लगेको बताउँदै लामिछानेको आरोप अस्वीकार गरेको छ ।
