तुलसीपुर । दाङमा मोटरसाइकल दुर्घटना हुँदा एक जनाको मृत्यु भएको छ। दुर्घटनामा थप दुई जना घाइते भएका छन्।
मृत्यु हुनेमा तुलसीपुर उपमहानगर-३ खमारी बस्ने मोटरसाइकलमा पछाडि सवार करिब १६ वर्षीय दीपेन्द्र वली छन्। उनको टाउको र छातीमा भित्री चोट लोगको प्रहरीको भनाइ छ।
आइतबार दिउँसो करिब साढे २ बजेतिर तुलसीपुर-४ ठूलाखालीस्थित खाद्रे बनहरीबाट तुलसीपुरतर्फ आउँदै गरेको लु.प्र.०२–००१ प १७१७ नम्बरको मोटसाइकल आफैँ अनियन्त्रित भई रूखमा ठोक्किएर सडकदेखि ५ मिटर तल खसेर दुर्घटना भएको इलाका प्रहरी कार्यालय तुलसीपुरका प्रहरी निरीक्षक प्रकाश थापाले जानकारी दिए।
उनका अनुसार उक्त मोटरसाइकलमा मृतक वलीसहित मोटरसाइकल चालक तुलसीपुर-४ कल्लेखोला बस्ने १७ वर्षीय गणेश खड्का र तुलसीपुर-४ घोरनेटी बस्ने करिब १८ वर्षीय सन्दीप वली सवार थिए। दुर्घटनामा परी घाइते भएका तीनैजनालाई उपचारका लागि राप्ती प्रादेशिक अस्पताल तुलसीपुर ल्याएको थियो।
उपचारका क्रममा दीपेन्द्रको करिब सवा ३ बजेतिर मृत्यु भएको प्रहरीले जनाएको छ। यस्तै चालक गणेशको अवस्था मध्यम रहेको र सन्दीपको छाती‚ ढाड र टाउकोमा भित्री चोट लागेको र अवस्था गम्भीर रहेको प्रहरीले जनाएको छ।
उनलाई थप उपचारका लागि तुलसीपुर-७ मोतीपुरस्थित राप्ती लाइफ केयर अस्पतालमा रिफर गरिएको प्रहरीले जनाएको छ।
