काठमाडौं । दक्षिण तथा मध्य एसिया हेर्ने अमेरिकी सहायक विदेशमन्त्री डोनाल्ड लु नेपाल भ्रमणमा आएका छन् । सहायक विदेशमन्त्री लु आइतबार काठमाडौं आएका हुन् ।
आफ्नो दक्षिण एशिया भ्रमणको क्रममा उनले नेपाल भ्रमणका क्रममा सरकारका नेतृत्वकर्ताहरूसँग शिष्टाचार भेट र नागरिक समाजसँग कुराकानी गर्ने काठमाडौंस्थित अमेरिकी दूतावासले जनाएको छ ।
उनको यो भ्रमणले अमेरिका–नेपाल सम्बन्धलाई मजबुत बनाउने र वातावरणीय सुरक्षा, महिला सशक्तिकरण, सांस्कृतिक संरक्षण, र दिगो विकासजस्ता मुख्य क्षेत्रहरूमा दुई देशबीचको सहकार्यलाई अघि बढाउन मद्दद पुग्ने दूतावासले उल्लेख गरेको छ ।
प्रधानमन्त्री केपी शर्मा ओलीको चीन भ्रमणलगत्तै अमेरिकी उच्च अधिकारीको नेपाल भ्रमणलाई चासोका साथ हेरिएको छ ।
