काठमाडौं । यू–१९ एसियाकपको तयारीमा रहेको नेपालले भारतको कर्नाटक यू–१९ लाई १२१ रनको फराकिलो अन्तरले पराजित गरेको छ ।
आइतबार मूलपानी क्रिकेट मैदानमा भएको खेलमा जित निकालेसँगै नेपालले ५ खेलको सिरिजमा २–१ को अग्रता पनि लिन सफल भएको छ । जितका लागि २ सय ८३ रनको लक्ष्य पछ्याएको कर्नाटकले ४०.२ ओभरमा सबै विकेट गुमाएर १६१ रनमा समेटिन पुग्यो ।
टस हारेर पहिला ब्याटिङ गरेको नेपालले निर्धारित ओभरमा ६ विकेट गुमाएर २८२ रनको बलियो योगफल तयार पारेको थियो । २८३ रनको जवाफी लक्ष्यसहित मैदान उत्रिएको कर्णाटकको मध्यम सुरुवात गरेको थियो । कर्नाटकले ४०.२ ओभरमा सवै विकेट गुमाएर १६१ रनमात्रै बनाउन सक्यो ।
