ताप्लेजुङ । पूर्वको प्रसिद्ध तीर्थस्थल ताप्लेजुङको पाथीभरामा केबलकार बनाउने विषयमा विवाद हुँदा दुई पक्षीबीच झडप भएको छ ।
शुक्रबार दिउँसो तल्लोफेदीस्थित काफ्ले पाटीमा केबलकारको स्टेशन बनाउनलाई शिलान्यास गर्ने कार्यक्रम राखिएको थियो । एमालेका जिल्ला अध्यक्ष डम्बरध्वज तुम्बाहाम्फे, फुङलिङ नगरपालिकाका मेयर अमिर मादेन लगायत शिलान्यास गर्न पुगेका थिए ।
तर, कार्यक्रम सुरु भएलगत्तै पाथीभरामा केबलकार बनाउन नदिने समूहले ढुंगा हान्न थालेपछि झडप भएको प्रहरीले जनाएको छ । प्रहरीका अनुसार निर्माणका लागि आवश्यक पर्ने डोजरलगायतका उपकरण लैजान अवरोध भएपछि मजदुरहरु प्रतिकारमा उत्रिएका थिए ।
मजदुरहरु प्रतिकारमा उत्रिएपछि दोहोरो झडप भएको प्रहरीले जनाएको छ । पाथीभरामा केवलकार निर्माण गर्न नहुने भन्दै लामो समयदेखि पहिचान पक्षधरहरु आन्दोलित हुँदै आएका छन् ।
पहिचान पक्षधरहरुले पाथीभरालाई मुकुम्लुङका नाममा आस्थाका साथ मान्दै आएका छन् । केवलकार निर्माण भए प्रकृति नष्ट हुने बताउँदै आएका छन् ।
तस्बिरः हेमराज निरौला
