काठमाडौँ । पाँचौँ मिस्टर काठमाडौँ शारीरिक सुगठन प्रतियोगिताको उपाधि फोनिक्स फिट्शालाका प्रकाश राईले जितेका छन् । त्रिपुरेश्वरस्थित राष्ट्रिय खेलकुद परिषद्को कभर्डहलमा आइतबार भएको विभिन्न पाँच तौल समूहका विजेतालाई उछिन्दै उनी च्याम्पियन बनेका हुन् ।
पुरुष ७५ किलोमाथि तौलसमूहमा पहिलो हुँदै राई मिस्टर काठमाडौँ उपाधि होडमा प्रवेश गरेका थिए । उनले मिस्टर काठमाडौँका लागि एक लाख ५० हजार र आफ्नो स्पर्धामा पहिलो भएबापत छुट्टै १५ हजार नगद पुरस्कार प्राप्त गरे ।
त्यसैगरी, अन्य पाँच स्पर्धामा पहिलो हुँदै मिस्टर काठमाडौँका लागि प्रतिस्पर्धा गर्ने खेलाडीमा पुरुष ५५ किलोतर्फ डिभाइन फिजिकल फिट्नेसका राजकुमार मानन्धर, ६० किलोतर्फ एक्सट्रिम फिट्नेसका चनबहादुर थापा, ६५ किलोमा ग्यालेक्सी फिट्नेसका हर्कबहादुर राई, ७० किलोमा कालीमाटी फ्रेन्डसिप जिमका देवेन्द्र वज्राचार्य तथा ७५ किलोमुनिमा फिट्नेस टाइमका कृष्णप्रसाद श्रेष्ठ रहेका छन् ।
छ स्पर्धामा शीर्ष तीन स्थान हात पार्नेले क्रमशः १५ हजार, १० हजार र पाँच हजार पुरस्कार प्राप्त गरे । काठमाडौँ जिल्ला शारीरिक सुगठन तथा फिट्नेस सङ्घद्वारा आयोजित उक्त प्रतियोगिताको जुनियर पुरुष शारीरिक सुगठनमा डाइन्यास्टी फिट्नेस क्लबका आदित्य श्रेष्ठ पहिलो, दी जिम एक्सका रिसब श्रेष्ठ दोस्रो र अल्टिमेट लिफ्टिङ क्लबका अशिमसिंह थापा तेस्रो भए ।
यस्तै पुरुष मास्टर्स शारीरिक सुगठनमा डिभाइनका रमेश अधिकारी पहिलो, माई फिट्नेस जिमका सलिम कुराइसी दोस्रो र भुमही जिम एन्ड फिट्नेसका नवराज डुम्रे तेस्रो बने । पुरुष स्पोर्ट्स फिजिक एक सय ७० सेन्टीमिटरमाथि नेपाली युथ फिट एन्ड क्यालिस्थेनिकका निरल थापा पहिलो, आइरन प्याराडाइस फिट्नेस एन्ड स्पाका ज्ञानेश्वर चौधरी दोस्रो र फिट्नेस गराजका आकाश श्रेष्ठ शीर्ष तीन स्थानमा रहे ।
यसैगरी, पुरुष स्पोर्ट्स फिजिक एक सय ७० सेन्टीमिटरमुनि अल्टिमेट लिफ्टिङ क्लबका जमेश मगर पहिलो, एक्सपोज जिमका पुकार शाक्य दोस्रो तथा न्यू गोल्डस् फिजिकल सेन्टरका सुरज डङ्गोल तेस्रो भए । यी चार विधामा पहिलो हुनेले रु ३० हजार, दोस्रोले १५ हजार र तेस्रोले रु पाँच हजार पुरस्कार पाए ।
महिला एथ्लेटिक फिजिकमा जिम एक्सकी सानु श्रेष्ठ पहिलो, एक्सपोज जिमकी कमला श्रेष्ठ दोस्रो र गोल्डस् जिमकी उर्मिला श्रेष्ठ तेस्रो स्थानमा रहे । शीर्ष तीन स्थान हात पार्नेले क्रमशः ५० हजार, २५ हजार र १५ हजार पुरस्कार पाए ।
विजेतालाई गृहमन्त्री रमेश लेखक, सङ्घीय सांसद ठाकुर गैरे, पूर्वप्रदेशमन्त्री केशव स्थापित, नेपाल शारीरिक सुगठन तथा फिट्नेस महासङ्घका वरिष्ठ उपाध्यक्ष विजयलाल कायस्थ, आयोजक काठमाडौँ जिल्ला शारीरिक सुगठन तथा फिट्नेस सङ्घका अध्यक्ष सुरेश सुवेदीलगायतले पुरस्कार प्रदान गरे । एकदिने प्रतियोगितामा दुई सय आठ खेलाडीले प्रतिस्पर्धा गरेका थिए ।
