काठमाडौँ । अविरल वर्षाका कारण मङ्गलवार आन्तरिकतर्फका उडानहरू प्रभावित बन्न पुगेको छ । त्रिभुवन अन्तर्राष्ट्रिय विमानस्थलका अनुसार बिहान ११ बजेसम्म एक दर्जन हाराहारी आन्तरिक उडानहरू प्रभावित बनेका छन् ।
आगमनतर्फ खासै समस्या नभएको विमानस्थलले जानकारी दिएको छ ।
काठमाडौँबाट भरपुर, पोखरा, सिमरा, भैरहवा, नेपालगन्ज र विराटनगर रुटका जहाजहरू उड्न केही ढिलाइ भएको विमानस्थलले जनाएको छ । बुद्ध एयरको काठमाडौँदेखि भरतपुरका लागि ८ बजेको उडान तालिका रहेको जहाज खराब मौसमकै कारण प्रभावित हुन पुगेको छ ।
यसैगरी यती एयरलाइन्सको काठमाडौँदेखि सिमराका लागि ८ बजेकै उडान तालिका रहेको जहाज खराब मौसमकै कारण हालसम्म उड्न सकेको छैन ।
काठमाडौँदेखि पोखराका लागि ९ बजेको उडान तालिका रहेको यती एयरलाइन्सकै अर्को जहाज पनि हालसम्म उड्न नसकेको विमानस्थलले जानकारी दिएको छ ।
बुद्ध एयरको काठमाडौँदेखि पोखरा, काठमाडौँदेखि विराटनगर, काठमाडौँदेखि सिमरा, काठमाडौँदेखि भद्रपुर उडान तालिका रहेका जहाजहरू केही ढिला भएका छन् ।
यसैगरी यती एयरलाइन्सको काठमाडौँदेखि नेपालगन्ज, श्री एयरलाइन्सको काठमाडौँदेखि भैरहवाको उडान रहेको जहाज समेत खराब मौसमकै कारण प्रभावित हुन पुगेका छन् । यी फ्लाइटका यात्रुहरूको बोडिङ पास भइसकेपनि मौसम नखुल्दा उडान हुन नसकेको विमानस्थलले जानकारी दिएको छ ।
