काठमाडौं । विशेष अदालतले सेयरको भित्री कारोबारको अभियोगमा दोषी ठहर भएका गुरुप्रसाद न्यौपानेलाई एक वर्ष कैदको सजाय सुनाएको छ ।
आइतबार विशेष अदालतका अध्यक्ष न्यायाधीश टेकनारायण कुँवर, रामबहादुर थापा र मुरारीबाबु श्रेष्ठको इजलासले न्यौपानेले एक करोड ९९ लाखभन्दा बढी रुपैयाँ सम्पत्ति शुद्धीकरण गरेको ठहर गरेको हो ।
अदालतले एक करोड ९९ लाख १० हजार २ सय ५२ रुपैयाँ बिगोको दोब्बर जरिवाना हुनेगरी ३ करोड ९८ लाख २० हजार ५ सय ४ रुपैयाँ जरिवाना र २ वर्ष कैद सजाय तथा बिगो कायम गरिएको रकम बराबरको सम्पत्ति जफतको फैसला गरेको छ ।
अदालतले न्यौपानेलाई ६ चैतमा दोषी ठहर गरेकोमा आइतबार सजाय निर्धारण गरेको हो । रिडीको सञ्चालक समिति अध्यक्ष रहेका न्यौपानेले ‘सार्वजनिक नभएका धितोपत्रको मूल्यमा असर पर्नसक्ने महत्वपूर्ण जानकारी हुँदाहुँदै आफ्नो नाममा कायम रहेको उल्लेख्य संख्याको सेयर खरिदबिक्री गरेको’ अदालतको ठहर छ ।
ज्येष्ठ नागरिक भएकाले र प्रतिवादीको सामाजिक–पारिवारिक दायित्वसमेतलाई विचार गरी उनको कैद घटाइएको हो । सुरुमा दुई वर्ष कैद सजाय तोकिएकोमा प्रतिवादी न्यौपानेको उमेर हेरेर विशेषले ५० प्रतिशत कैद घटाएको फैसलामा उल्लेख छ । यसै मुद्दाका अर्का प्रतिवादी कुवेरमणी नेपालले सफाइ पाएका छन् ।
