काठमाडौं । उच्च अदालत दीपायलका रजिष्ट्रार रणबहादुर कटवाल भ्रष्टाचार मुद्दामा दोषी ठहर भएका छन् । आइतबार विशेष अदालतका न्यायाधीशद्वय खुसीप्रसाद थारु र रामबहादुर थापाको इजालसले कटवाललाई दोषी ठहर गरेको हो ।
विशेषका उपरजिष्ट्रार धनबहादुर कार्कीका अनुसार कटवाललाई नौ महिना कैद र चार लाख ९८ हजार रुपैयाँभन्दा बढी जरिवाना हुने भएको छ। बिगोबमोजिम रकम असुलउपरसमेत हुने फैसलामा उल्लेख छ ।
कटवालले श्रीमतीको नाममा काल्पनिक कागजात तयार गरी हलुका सवारी चालक र कम्प्युटर अपरेटरका रुपमा करारमा राखी त्यसवापत पारिश्रमिक भुक्तानी लिने प्रयास गरेका थिए। त्यस क्रममा एक लाख १२ हजार रुपैयाँका लागि लेखा शाखामा प्रस्तुत गरेको भेटिएको थियो ।
