काठमाडौं। सन् २०२३ को मानव अधिकार उल्लंघन सूचकांकमा सबैभन्दा खराब बागमती प्रदेशको रहेको इन्सेकले जनाएको छ। अनौपचारिक क्षेत्र सेवा केन्द्र (इन्सेक)ले फागुन ७ गते सार्वजनिक गरेको नेपाल मानव अधिकार वर्ष पुस्तक २०२४ मा यस्तो नतिजा समेटिएको हो।
सार्वजनिक नतिजा अनुसार नकारात्मकबाट बागमती पहिलो, मधेश दोस्रो र कोशी तेस्रो छन्। त्यसैगरी सकारात्मक नतिजाबाट सुदूरपश्चिम पहिलो, गण्डकी दोस्रो र कर्णाली तेस्रो स्थानमा आएका छन्। सन् १९९२ देखि वर्ष पुस्तक निकाल्दै आएको इन्सेकले ‘नेपाल मानव अधिकार वर्ष पुस्तकमा मानव अधिकार उल्लंघन सूचकांक समेटेको यो नै पहिलो रहेको इन्सेकका अध्यक्ष डा. कुन्दन अर्यालले बताए।
शारीरिक हिंसा प्रतिविम्वित हुने मानव अधिकार उल्लंघनको समग्र सूचकाङ्कमा ८५.२४ अंकसहित बागमती सबैभन्दा खराब अवस्थामा छ। मधेशको ६४.३९, कोशीको ४९.८१, लुम्बिनीको ४२.१२, कर्णालीको ३१.२५, गण्डकीको १६.३६ र सुदूरपश्चिमको ९.५१ अंक रहेको सूचकांकमा समावेश गरिएको छ।
