नारायणगढ । कार्यवाहक प्रधानमन्त्री पूर्णबहादुर खड्काले सरकार सुशासनको मार्गचित्रसहितको राष्ट्रिय कार्ययोजनाको तयारीमा रहेको बताएका छन् ।
नेपाली कांग्रेस प्रशिक्षण शाखा नवलपरासी (बर्दघाट सुस्तापूर्व)को आयोजना र नेपाली कांग्रेस जिल्ला कार्यसमिति नवलपरासी (बर्दघाट सुस्तापूर्व)को संयोजनमा तीन दिने प्रशिक्षक प्रशिक्षणको आज गैँडाकोटमा उद्घाटन गर्दै उनले सरकारले एक महिनाभित्र सुशासनको मार्गचित्रसहित कार्ययोजनाको घोषणा गर्ने बताए ।
उनले भने, “यो अभियान लागू भएको दुई–तीन महिनापछि धेरै विषयमा सेवाग्राहीले धेरै ठूलो पीडाबाट मुक्ति पाउने र सरकारबाट पाउनुपर्ने सेवा सुविधा पाउन थाल्यौँ भन्ने खालको आशा, भरोसा र विश्वासको अवस्था सिर्जना गर्नेगरी काम अगाडि बढाउँदैछौँ ।”
उहाँले दैनिक सेवाग्राहीले सरकारी कार्यालयमा ढिलासुस्तीका कारणले पाउने दुःख र समस्याको सुधार हुँदै गएको र यसको पूर्ण सुधारका लागि सरकारले कार्ययोजनाका साथमा काम गरिरहेको बताए । चाँडै नै सुकुम्बासी तथा अव्यवस्थित बसोबासको समस्या समाधान गर्ने गरी सरकार अगाडि बढेको बताए ।
भन्दै उनले यसमा राजस्व बढी भयो भन्ने गुनासोको सुनुवाइ भएको र जनताकोे चित्त बुझाउने गरी राजस्व घटाउने तयारीमा सरकार रहेको बताए ।
त्यस अवसरमा कांग्रेसका केन्द्रीय सदस्य गोविन्द भट्टराईले नेपालमा नीति बनाउने क्रममा कांग्रेसको नेतृत्वदायी भूमिका रहेको बताए । कांग्रेसले विभिन्न समयमा उल्लेख्य योजनाका साथ काम गरेकोे तर यसको तत्थ्याङ्क नराख्दा जश अरुले पाउने गरेको उनको भनाइ थियो ।
गण्डकी प्रदेश सरकारका कृषि तथा भूमि व्यवस्थामन्त्री तथा नेपाली कांग्रेस नवलपुर जिल्ला सभापति महेन्द्रध्वज जिसी, कांग्रेस चितवन जिल्ला सभापति राजेश्वर खनाल, गण्डकी प्रदेश प्रशिक्षण विभागका डा कुस्माखर न्यौपानेलगायतले पनि सो अवसरमा मन्तव्य राखेका थिए ।
प्रशिक्षण नवलपरासी (बर्दघाट सुस्तापूर्व)का गाउँपालिकाबाट एक महिलासहित चार र नगरपालिकाबाट एक महिलासहित पाँच गरी ४५ जना सहभागी हुने कांग्रेस नवलपरासी (बर्दघाट सुस्तापूर्व)का उपसभापति तथा प्रशिक्षण शाखा प्रमुख बालकृष्ण घिमिरेले जानकारी दिए ।
