हेटौंडा । पूर्वपश्चिम राजमार्गअन्तर्गत मकवानपुरको हेटौँडामा मोटरसाइकलको ठक्करबाट प्रहरी जवानको मृत्यु भएको छ ।
बुधबार बिहान हेटौंडा उपमहानगरपालिका थानाभर्याङमा मोटरसाइकलले ठक्कर दिँदा डडेलधुरा आलिताल गाउँपालिका–६ घर भई बागमती प्रदेश प्रहरी गण हेटौँडामा कार्यरत २५ वर्षीय प्रहरी जवान विनोद एडीको मृत्यु भएको हो ।
हेटौँडा बजारबाट नवलपुरतर्फ जाँदै गरेको ना ४३ प २२२ नम्बरको मोटरसाइकलले पीटी दौडिँदै गरेका एडीलाई ठक्कर दिएको थियो । ठक्करबाट घाइते भई उपचारका लागि हेटौँडा अस्पताल पुर्याउँदा उनलाई डाक्टरले मृत घोषणा गरेका थिए ।
मोटरसाइकल चालक हेटौँडा उपमहानगरपालिका वडा नम्बर–४ हुप्राचौर बस्ने ४१ वर्षीय लक्ष्मण लामा घाइते भएका छन् । उनलाई उपचारका लागि चितवन पठाइएको प्रहरीले जनाएको छ ।
