काठमाडौं । कोरोना महामारीबाट नेपालमा पहिलो मृत्यु भएका सावित्री तिमल्सिना चालिसेको छोरालाई स्वास्थ्यमन्त्री मोहन बस्नेतले निशुल्क पढाइदिने भएका छन् ।
कोरोना महामारी फैलिएपछि वि.सं. २०७७ जेठ महिनामा सिन्धुपाल्चोक बाह्रविसे नगरपालिका–९ राम्चेकी सुत्केरी चालिसेको मृत्यु भएको थियो । त्यसबेला उनका छोरा सफल ९ दिनका मात्र थिए ।
उनै चालिसेको छोरालाई मन्त्री बस्नेतले आफ्नै निजी खर्चमा कक्षा १२ सम्म निःशुल्क पढाइदिन लागेका हुन् । आज सफललाई काठमाडौंको टोखा–९ गोँगबुस्थित कान्तिपुर इङ्लिस एकेडेमीमा भर्ना गरिदिएका छन् ।
उनले चालिसेका छोरा सफलको पठनपाठनको खर्चस्वरुप आज ६० हजार नगद विद्यालयका प्राचार्य माधवप्रसाद अधिकारीलाई हस्तान्तरण गरे ।
रकम हस्तान्तरणपछि सञ्चारकर्मीसँग कुरा गर्दै मन्त्री बस्नेतले सफलको कक्षा १२ सम्मको पढाई खर्च आफूले बेहोर्ने बताए । उनले सफलको भर्ना गर्न पाउदा ज्याँदै खुशी मिलेको समेत बताए ।
