काठमाडौँ । झारफुक गर्ने एक महिलालाई प्रहरीले पक्राउ गरेको छ । प्रहरीले नागार्जुन नगरपालिका वडा नम्बर १ रानीवन पानीट्याङ्की बस्ने ‘माता’ भनिने ४८ वर्षीय उमा शाही ठकुरीलाई पक्राउ गरेको हो ।
शनिबार बिहान ६ बजे सिन्धुपाल्चोकको चौतारा साँगाचोकगढी–२ घर भई हाल भक्तपुरको मध्यपुर ठिमी–७ धुन्चेपाखा बस्ने १४ वर्षीया बालिकालाई ठकुरीले झारफुक गर्ने क्रममा बेहोस भएकी थिइन् । बेहोस भएकी बालिकालाई उपचारको लागि मनमोहन मेमोरियल अस्पतालमा ल्याइएकोमा बालिकाको मृत्यु भइसकेको बताएको थियो ।
त्यो खवर पाएपछि महानगरीय प्रहरी बृत्त स्वयम्भूबाट अनुसन्धान अधिकृतसहितको प्रहरी टोली अस्पताल पुगी शवको जाँच मुचुल्का र घटनास्थलको मुचुल्का उठाएको थियो । प्रहरीले बालिकाको शवलाई पोस्टमार्टमको लागि शिक्षण अस्पताल महाराजगञ्जमा पठाइएको बताएको छ ।
अनुसन्धानको क्रममा मृतकलाई उनकी आमाले २२ दिन पहिले उपचारको लागि ठकुरीको झारफुक केन्द्रमा ल्याई छोडेको खुलेको छ। प्रहरीले ठकुरीलाई नियन्त्रणमा लिई कर्तब्य ज्यान कसूरमा काठमाडौं जिल्ला अदालतबाट ७ दिनको म्याद थप गरी अनुसन्धान अघि बढाएको छ ।
