नेपालगञ्ज । राष्ट्रिय प्रजातन्त्र पार्टी नेपालका अध्यक्ष कमल थापाले देश अभिभावकविहीन भएको बताएका छन् ।
शनिबार नेपालगञ्जमा आयोजित पत्रकार सम्मेलनमा बोल्दै अध्यक्ष थापाले देश अभिभावकविहीन भएकाले देशमा छाडातन्त्रलाई नियन्त्रण गर्न राजतन्त्रको खाँचो भएको बताए । राजतन्त्रलाई अभिभावक र मोरलको रुपमा स्थापना गर्न आवश्यक रहेको उनले बताए ।
राष्ट्रिय संकटलाई समाधान गर्न देशमा राजतन्त्र अपरिहार्य रहेको कुरामा उनले जोड दिए । देशमा राजतन्त्र कायम गरियो भने छाडातन्त्र, मनपरीतन्त्र, विकृति, विसंगती हटाउन सकिने उनले बताए ।
देशमा सनातन हिन्दु धर्म पनि अति आवश्यक रहेको उनले बताए । उनले जनतामा अहिलेको मुलुकको आवश्यकताबारे जानकारी दिन पार्टीले देशका विभिन्न भागहरुमा सभाको आयोजना गर्ने बताए ।
थापाले माघ र फागुनमा मेची महाकाली यात्राका माध्यमबाट जनतामा जागरुक तुल्याउने कार्यक्रम राखिएको र फागुन महिनादेखि आन्दोलन गर्ने तयारी गरिरहेको जानकारी दिए ।
उनले विदेशीको दबाव र प्रभावमा निहित राजनीतिक स्वार्थको लागि बहुसंख्यक जनताको पहिचानलाई समाप्त पार्न खोजे देशमा द्वन्द्व सृजना हुने जिकिर गरे ।
