इजरायली हवाई आक्रमणमा गाजामा दुई पत्रकार मारिएका छन् । गाजा पट्टीको पश्चिमी भागमा रहेको एक आवासीय भवनमा इजरायली हवाई आक्रमणमा दुई स्थानीय पत्रकारको मृत्यु भएको छ भने एक जना घाइते भएको हमास नियन्त्रित सरकारी मिडिया कार्यालयले जारी गरेको विज्ञप्तिमा उल्लेख छ ।
पत्रकार सइद अल-तावील र मोहम्मद सबाह इजरायलको निशानामा रहेको भवन खाली गर्ने विषयको रिपोर्टिंग गर्नेक्रममा क्रममा हवाई आक्रमणमा मारिएका थिए । उनीहरूसँगै रहेका अर्का पत्रकार हिशाम अल-नवाजा घाइते भएका छन् र हाल उनको उपचार भइरहेको मिडिया कार्यालयका प्रमुख सलामा मारुफले बताएका छन् ।
हमासले गत शनिबारदेखि इजरायलमा आक्रमण शुरुगरेपछि अहिलेसम्म दुवैतर्फ १५ सय भन्दा बढीको मृत्यु भएको छ । जसमा अहिलेसम्म ९ सय इजरायलीको मृत्यु भएको छ भने गाजामा ६ सय भन्दा बढीले ज्यान गुमाएका छन् । हमासको आक्रमणमा थाइल्याण्डका १२ र नेपालका १० सहित करिब तीन दर्जन विदेशीले पनि ज्यान गुमाएको मिडिया रिपोर्टमा उल्लेख छ ।
