लमजुङ । विगत केही दिनयता लमजुङमा पनि आँखा पाक्ने रोग तीब्र रुपमा फैलिएको छ । जिल्लाका ८ वटै पालिकामा गरी २ हजार ७३३ जना आँखा पाक्ने रोगको सङ्क्रमणबाट ग्रसित भएका छन् ।
जिल्ला जनस्वास्थ्य कार्यालय लमजुङका अनुसार मगंलबारसम्म सबैभन्दा धेरै सुन्दरबजार नगरपालिकामा ९१२, मध्यनेपाल नगरपालिकामा ४५७, राइनास नगरपालिकामा ४०८ बेँसीसहर नगरपालिकामा २५०, मर्स्याङ्दी गाउँपालिकामा ५३५, दोर्दी गाउपालिकामा ९३ जना, क्होलासोथारमा ५३ जना र दुधपोखरी गाउँपालिकामा २५ जनामा संक्रमण फेला परेको छ ।
जनस्वास्थ्य कार्यालय लमजुङका जनस्वास्थ्य निरीक्षक दीपक बम्जनका अनुसार आँखा पाक्ने रोगले वृद्धवृद्धादेखि बालबालिकासम्मलाई प्रभावित बनाएको छ ।
कुन उमेरका कति संक्रमति भनेर तथ्यांक नभएपनि विशेषगरि बालकालिका धेरै प्रभावित भएका छन् । विद्यालयमा रहँदा समूहमा बस्ने हुँदा बालबालिकामा धेरै संक्रमण भएको बताइएको छ । अधिकांश बालबालिकामा आँखा पाक्ने समस्या बढेपछि लमजुङका केही विद्यालय बन्द गरिएका छन् ।
बेसिशहर नगरपालिकाको बेँसीसहर बजार क्षेत्रमा आँखा पाक्ने समस्या धेरैमा देखिन थालेपछि वडा नं ७ र ८ मा रहेका निजि तथा सरकारी विद्यालय ३ दिनका लागि बन्द गरिएको हो ।
आँशुको माध्यमबाट सर्ने यो संक्रमण सङ्क्रमितको हातबाट अरुको हात हुँदै आँखासम्म पुग्ने गरेको देखिएको छ । त्यस्तै संक्रमितका रुमाल, तौलिया, सिरानीजस्ता सामान अरुले प्रयोग गर्दा पनि संक्रमण सर्ने गरेको, फैलिने गरेको चिकित्सकहरूको भनाइ छ । भाइरल कन्जन्टीभाइटीसको लक्षण देखिन चारदेखि १२ दिन लाग्छ ।
यो अवधिमा आँखामा कुनैपनि समस्या देखिए आफैँ औषधि लगाउनुभन्दा पनि विशेषज्ञको परामर्श लिनुपर्ने चिकित्सकको भनाई छ । सङ्क्रमणबाट बच्न आँखालाई समय समयमा सफा पानी वा कटनले पुछिरहने, भीडभाड भएको ठाउँमा नजान र पटक–पटक हात धुने गर्न चिकित्सकको सुझाव छ ।
