मस्को । रुसका राष्ट्रपति भ्लादिमिर पुटिनले मस्को र प्योङयाङबीचको सम्बन्धलाई अझ सघन बनाउन उत्तर कोरियाली राष्ट्रपतिलाई आग्रह गरेका छन् ।
उत्तर कोरियाको राष्ट्रिय स्वतन्त्रता दिवसका अवसरमा आफ्ना उत्तर कोरियाली समकक्षी किम जोङ अनलाई आज पठाउनु भएको बधाई सन्देशमा रुसी राष्ट्रपतिले मस्को र प्योङयाङबीचको सम्बन्धलाई अझ सघन एवम् सुमधुर बनाउन आग्रह गरेका हुन् । क्रेमलिनले युक्रेनमा सेना तैनाथ गरेपछि र गत वर्षदेखि नै पश्चिमा मुलुकले शत्रुवत् व्यवहार गरेपछि रुस र उत्तर कोरिया एकजुट भएका छन् ।
यद्यपि दुवै देशमाथि पश्चि कठोर प्रतिबन्ध लगाउनका साथै अन्तरराष्ट्रिय समुदायबाटै एक्ल्याउने प्रयास गरेका छन् । “म विश्वस्त छु कि हामी कोरियाली प्रायद्वीप र समग्र उत्तरपूर्वी एसियाली क्षेत्रमा स्थायित्व सुरक्षा सुदृढ गर्ने तथा हाम्रा जनताको हितका लागि सबै क्षेत्रमा द्विपक्षीय सहयोगलाई निरन्तरता दिनेछौँ,” राष्ट्रपति पुटिनले पठाएको सन्देशमा भनिएको छ ।
गत महिना प्योङयाङमा आफ्ना समकक्षी काङ सुन नामसँगको भेटमा उत्तर कोरियासँगको आफ्नो देशको साझेदारीलाई रक्षामन्त्री सर्गेई शोइगुले प्रशंसा गरेपछि रुसी नेताको यो भनाइ स्वतन्त्रता दिवसका सन्दर्भमा सार्वजनिक भएको छ ।
अमेरिकी विदेशमन्त्री एन्टोनी ब्लिन्केनले रुसी रक्षामन्त्री सैन्य सहयोग प्राप्त गर्ने चाहनाका साथ प्योङयाङको भ्रमणमा गएको प्रतिक्रिया दिएका थिए । उत्तर कोरियाबाट हतियारको आपूर्ति सुरक्षित गर्न रुसी रक्षामन्त्री प्योङयाङ गएको अमेरिकाले बताएको थियो ।
