काठमाडौं । मलेसियामा जारी एसीसी यू-१६ इस्टर्न जोन कपमा नेपालले थाईल्यान्डलाई २ सय २५ रनको फराकिलो अन्तरले पराजित गरेको छ ।
नेपालले दिएको २७० रनको लक्ष्य पछ्याएको थाईलयाण्ड १३ दशमलब २ ओभरमा ४४ रन बनाउँदै अलआउट भयो ।
त्यसअघि टस जितेर पहिला ब्याटिङ गरेको नेपालले निर्धारित ३५ ओभरमा ८ विकेट गुमाउँदै २ सय ६९ रन बनाएको थियो ।
थाईल्यान्डका लागि ईसान बेर्नोजीले १६ तथा ओपनर डानुफोनले १२ रन बनाउँनु बाहेक अन्य ब्याटरले दोहोरो अंकमा रन बनाउन सकेनन् । थाईल्यान्डका सात खेलाडी शुन्य रनमा आउट भए ।
नेपालका लागि सन्तोष यादवले ह्याट्रिकसहित ५ विकेट लिए । अशोक धामीले ३ तथा कप्तान अभिसेक तिवारीले २ विकेट लिए ।
यसअघि मलेसियाको बांगीमा टस जितेर पहिला ब्याटिङ गरेको नेपलाले निर्धारित ३५ ओभरमा ८ विकेट गुमाएर २६९ रन बनाएको थियो ।
नेपालका लागि निरज कुमार यादवले ४३ बलमा ७४ रन बनाए । यस्तै नरेन भट्टले ४३ बलमा अविजित ५५ र सूर्यांशुले ५५ बलमा ४० रन बनाए ।
थाईल्यान्डका निटपाखन मनुवुन, ईशान बानेर्जी र पनुवातले समान २–२ विकेट लिए तथा जित साद र पियावत नोद्रीले समान १–१ विकेट लिए ।
यो जितसँगै नेपालले सेमिफाइनलमा स्थान बनाएको छ । पराजित थाईल्यान्ड भने प्रतियोगिताको समूह चरणबाट बाहिरिएको छ । थाईल्यान्ड पहिलो खेलमा घरेलु टोली मलेसियासँग पराजित भएको थियो ।
प्रतियोगितामा सात टोलीको सहभागीता रहेको छ । सहभागी सात टोलीलाई दुई समूहमा विभाजन गरिएको छ । समूह ए मा नेपाल, थाईल्यान्ड र मलेसिया छन् ।
समूह बी मा सिंगापुर, हङकङ, माल्दिभ्स र इन्डोनेसिया छन् । नेपालले आफ्नो समूह चरणको अन्तिम खेल शुक्रबार मलेसियासँग खेल्नेछ । सेमिफाइनल ३ जुलाई र फाइनल ४ जुलाईमा हुनेछ ।
