नयाँदिल्ली । भारतको कर्नाटकमा सम्पन्न विधानसभा चुनावको प्रारम्भिक नतिजा आउन सुरु गरेको छ ।
भारतीय सञ्चारमाध्यमका अनुसार कर्नाटकमा हाल सम्पन्न विधानसभा निर्वाचनबाट कांग्रेस आई अगाडी देखिएको छ ।
जसअनुसार कांग्रेस ९६ स्थानसहित अग्रस्थानमा छ भने भारतीय जनता पार्टीले पच्छाईरहेको छ । यो समाचार तयार पार्दासम्म भाजपा ७८ स्थानमा अगाडि छ । त्यहाँ २२४ सिटका लागि चुनाव भएको हो।
अधिकारीहरूले कर्नाटकमा बीजेपी हार्ने र कांग्रेसले बहुमत ल्याउने विश्लेषण गरिरहेका छन्। कर्नाटकका मुख्यमन्त्री बसवराज बोम्माईले भने आफ्नो सरकार बहुमतका साथ सत्तामा फर्किनेमा विश्वस्त रहेको प्रतिक्रिया दिएका छन्।
यसैगरी जेडिएस १८ स्थानमा अग्रस्थानमा देखिएको छ भने अन्य राजनीतिक दल ३ स्थानमा अग्रता लिईरहेका छन् । दिउँसोसम्म स्पष्ट नतिजा आइसक्ने निर्वाचन अधिकारीहरूले जनाएका छन्।
निर्वाचन आयोगको तथ्यांकअनुसार यो पटक प्रदेशमा ७३.१९ प्रतिशत मतदान भएको छ, जुन प्रदेशकै अहिलेसम्मकै उच्च रेकर्ड हो ।
