काठमाडौँ । प्रधानमन्त्री केपी शर्मा ओलीले चैत १५ गते राजधानीमा भएको समाजवादी मोर्चाको प्रदर्शन सभ्य रहेको बताएका छन् ।
‘शालीन जुलुससहित भएको त्यस कार्यक्रममा आयोजकहरूलाई धन्यवाद ज्ञापन पर्दछु । हाम्रो संघीय लोकतान्त्रिक गणतन्त्रलाई सुदृढ गर्ने विधि यस्तै हो भन्ने म ठान्छु’ सोमबार प्रतिनिधि सभाको बैठकलाई सम्बोधन गर्दै प्रधानमन्त्री ओलीले भने ।
उक्त कार्यक्रम भव्य रहेको भनेर पनि उनले धन्यवाद दिए । अगाडि भने, ‘यस सम्मानित सदनमा राम्रो उपस्थिति रहेका दलहरूको मूल नेतृत्वमा समाजवादी मोर्चाले काठमाडौँको प्रदर्शन मार्गीमा भव्य सभा गर्यो । आफ्नो धारणा सार्वजनिक गर्यो, सरकारलाई खबरदारी गर्यो । संविधान र व्यवस्थाप्रति आफ्नो प्रतिबद्धता जनायो ।’
शान्ति सुव्यवस्था कायम राख्दै विरोध र आलोचना गर्न पाइने संवैधानिक अधिकार रहेको उनले बताए । त्यसखाले आवाजलाई सम्मान गरिने उनले बताए ।
चैत १५ गते राजधानीमा नेकपा माओवादी केन्द्र, नेकपा एकीकृत समाजवादी, महिन्द्र राय यादव नेतृत्वको नेपाल समाजवादी पार्टी, नेत्र विक्रम चन्द नेतृत्वको नेपाल कम्युनिस्ट पार्टी सम्मिलित समाजवादी मोर्चाले प्रदर्शन गरेको थियो ।
उक्त प्रदर्शन शालीन रहेको भनेका प्रधानमन्त्री अोलीले तीनकुनेमा राजावादीले गरेको प्रदर्शन उत्तेजक रहेको भनेर आलोचना गरे ।
