धरान । कथाकार शुभचन्द्र राईको कथा सङ्ग्रह ‘समयले जन्माएका कथाहरू’ आज यहाँ लोकार्पण गरिएको छ । धरान उपमहानगरपालिकाका निवर्तमान प्रमुख तिलक राई, भाषाविद् प्रा डा टङ्कप्रसाद न्यौपाने, नाट्यकर्मी गोपाल देवान र कथाकार शुभचन्द्र राईले संयुक्त रुपमा कथासङ्ग्रह विमोचन गरेका हुन् ।
कथाको समीक्षा गर्दै प्रा डा न्यौपानेले भने, ‘शुभचन्द्रका सात वटा कथा पढ्दा भाषामा जनबोली रहेको छ । गाउँघरमा हामी जे बोल्छौँ, त्यो यहाँ आएको छ, कथामा ग्रामीण परिवेश आएको छ ।’ अर्का समीक्षक गोपाल देवानले नेपाली साहित्यको क्षेत्रमा यस कथा सङ्ग्रहले एउटा इँटा थप्न सफल भएको बताए । उनले शिल्पगत हिसाबमा सङ्ग्रहका कथाहरु सशक्त रहेको बताए ।
कथाकार राईले आफूले सत्य घटनालाई नै कथाका रूपमा उतारेको बताए । ओखलढुङ्गाको वामद्यालमा २०२४ सालमा जन्मिएका उनी वाम्बुले राई भाषाका लेखकसमेत हुन् । हाल उनी बेलायतमा बसोबास गर्दै आएका छन् ।
