पेरिस । फ्रान्सका प्रधानमन्त्री फ्रान्कोइस बायरोउले हालैका वर्षहरूमा फ्रान्सले युक्रेनबाहेक अन्य कुनै पनि युरोपेली देशको तुलनामा रुसलगायत ‘विदेशबाट’ बढी भ्रामक सूचना अभियानहरूको सामना गर्नुपरेको बताएका छन् ।
भ्रामक सूचना पत्ता लगाउने जिम्मेवारी पाएको फ्रान्सेली सरकारी निकाय भिगिनमले आयोजना गरेको फोरममा बेयरोउले भने, “फ्रान्स एक प्रमुख लक्ष्य हो । जारी द्वन्द्व र भूराजनीतिक तनावका सन्दर्भमा फ्रान्सलाई लक्षित गरी गलत सूचनाको सम्प्रेषण (सूचना युद्ध) को अवस्था अझ खराब भएको छ ।
“हामीले रुसबाट ठूलो मात्रामा हस्तक्षेप भइरहेको पत्ता लगाइरहेका छौँ, चीनबाट पनि सूचनामा हेरफेरको सङ्केत देखिएको छ,” प्रधानमन्त्री बेयरोउले भने ।
युरोपेली सङ्घको कूटनीतिक निकाय ‘युरोपिएन एक्सटर्नल एक्सन सर्भिस’को प्रतिवेदनलाई उद्धृत गर्दै उनले भने, “सन् २०२३ देखि २०२४ को बीचमा युरोपमा भएका ५०५ घटनामध्ये २५७ युक्रेनसँग सम्बन्धित र १५२ फ्रान्ससँग सम्बन्धित रहेका थिए ।”
“हाम्रो नजिक यो तत्कालको खतरा हो र यसले प्रत्येक फ्रान्सेली व्यक्तिलाई असर गर्दछ,” बायरोउले भने ।
आर्टिफिसियल इन्टेलिजेन्सले ‘अभूतपूर्व स्तरमा यो हेरफेरलाई अनुमति दिन्छ’, उनले भने ।
रुसले सन् २०२२ को फेब्रुअरीमा युक्रेनमाथि आक्रमण गरेदेखि नै फ्रान्स किएभको सबैभन्दा प्रमुख समर्थक रहँदै आएको छ ।
बिहीबार फ्रान्सका राष्ट्रपति इमानुएल म्याक्रोँले युक्रेनमा कुनै पनि युद्धविराम सम्झौतापछि ‘आश्वस्त’ सेना पठाउने योजना तय गर्ने उद्देश्यले शिखर सम्मेलनको आयोजना गरेका थिए ।
म्याक्रोँले आफू र बेलायती प्रधानमन्त्री केइर स्टार्मरले शान्तिका लागि युरोपको ‘गठबन्धन’ को समन्वय गर्ने सहमति भएको बताए ।
गत फेब्रुअरीमा जारी एक रिपोर्टमा भिगिनमले रुसले युक्रेनमाथिको आक्रमणका लागि समर्थन जुटाउन विगत तीन वर्षदेखि अत्यधिक सङ्गठित सूचना युद्ध अभियान सञ्चालन गरिरहेको बताएका थिए ।
