काठमाडौं । राजावादीहरुले आन्दोलन नरोक्ने निश्कर्ष निकालेका छन् । यही चैत्र १५ गते काठमाडौंमा भएको प्रदर्शन हिंसामा परिणत भएपछि आन्दोलन स्थगित भएको थियो । राजावादी आन्दोलनको जनकमाण्डर तोकिएका दुर्गा प्रसाईं नै यतिवेला फरार छन् ।
उनलाई सरकारले तिनकुने घट्नाको मुख्य मतियार तोकेको छ । राप्रपाका वरिष्ठ उपाध्यक्ष रवीन्द्र मिश्र र महामन्त्री धवलशमशेर जबरा शुक्रबार राति नै पक्राउ परेका हुन् । उनीहरुलाई आज म्याद थप्ने भनिएको छ । कुन कसुरमा मुद्दा चलाउने भन्नेबारे प्रहरीले सरकारी वकिलको कार्यालयमा राय लिँदैछ ।
उता, राजसंस्था पुनर्स्थापनाको लागि संयुक्त जनआन्दोलन समितिको संयोजक नवराज सुवेदीले आफू नजरबन्दमा परेको भन्दै कार्यवाहक नेतृत्व संस्कृतिविद जगमान गुरुङलाई सुम्पिएका छन् । सुवेदीले अब आन्दोलन जगमान गुरुङ (नेपाल ऋषि) को नेतृत्वमा हुने जानकारी गराएका छन् ।
