सिरहा । लहान नगरपालिका–२१ कलाबन्जरमा १४ कोठे सामुदायिक शौचालय निर्माण गरी समुदायलाई हस्तान्तरण गरिएको छ ।
लहान नगरपालिका, नेपाल खानेपानी संस्थान, वाटर एड नेपाल, एङ्गलियन वाटर र दलित कल्याण युवा क्लबको साझेदारीमा सञ्चालित ‘द विकन’ परियोजनाअन्तर्गत शौचालय निर्माण गरिएको हो ।
लहान नगरपालिकाका प्रमुख महेशप्रसाद चौधरीका अनुसार मुसहर समुदायमा सरसफाइको कमीका कारण रोगको समस्या देखिएकोले सामुदायिक शौचालय स्थापना गरिएको हो। ४१ घरधुरीले प्रयोग गर्ने यस शौचालय सञ्चालनका लागि मासिक रु १०० प्रति परिवार उठाइनेछ ।
रु २८ लाख ६२ हजार आठ सय आठ लागतमा निर्माण सम्पन्न भएको उक्त शौचालय लहान नगरपालिकाभित्र निर्माण भएका पाँच सामुदायिक शौचालयमध्ये एक हो ।
स्थानीयले शौचालय निर्माणपछि सहज भएको प्रतिक्रिया दिएका छन् । दिनाराम सामुदायिक शौचालय सञ्चालन तथा व्यवस्थापन समितिका अध्यक्ष लक्ष्मण सदायले भने, “अब हामी बाहिर जानुपर्दैन, शौचालय बनेपछि धेरै सहज भएको छ ।”
