काठमाडौं । नेकपा (एमाले) का सांसद योगेश भट्टराईले प्रधानमन्त्री केपी शर्मा ओली संसद्मा बोल्दै गर्दा नमिठो ढंगबाट अवरोध भएको भन्दै पार्टी र सिंगो सदनको तर्फबाट निन्दा गरेका छन् । प्रतिनिधिसभाको बैठकमा बोल्दै सांसद भट्टराईले यस्तो बताएका हुन् ।
प्रधानमन्त्री ओली बोल्दै गर्दा राप्रपाका सांसद ज्ञानबहादुर शाहीले नियमापत्ति गरेका थिए । त्यही विषयमा भट्टराईले आपत्ति जनाएका हुन् । उनले प्रधानमन्त्रीले संसद्को नियामावली, संविधान सबैलाई मध्यनजर गरेर बोलेको तर विपक्षी दल राप्रपाले असहिष्णु ढंगबाट अवरोध सिर्जना गरेको टिप्पणी गरे । उनले अहिलेको संसदीय व्यवस्था धेरै कुरा पचाएर आएकोले विचलित नभएको बताए ।
