काठमाडौं । नेकपा (एमाले) का नेता एवं प्रतिनिधि सभा सदस्य रघुजी पन्तले प्रतिपक्षीहरुले संविधानविपरीतको माग राखेर संसद् अवरोध गरेको आरोप लगाएका छन् । आज (आइतबार) संसद् भवन परिसरमा सञ्चारकर्मीहरुसँग संक्षिप्त कुराकानी गर्दै उनले प्रतिपक्षीहरुले राखेको माग संविधान र प्रतिनिधिसभा नियमावलीसम्मत नरहेको बताएका हुन् । प्रतिपक्षी दलहरुले कुलमान घिसिङलाई नेपाल विद्युत प्राधिकरणको कार्यकारी निर्देशकबाट हटाइएको विषयमा जवाफ दिनुपर्ने माग राख्दै आएका छन् ।
‘प्रतिपक्ष यो भन्दा अगाडि उठाइरहेको मागमा निरन्तर लागिरह्यो, जुन माग संविधानसम्मत छैन । प्रतिनिधि सभा नियमावलीअनुरुप पनि छैन । त्यसैले हामीले के भन्यौं भन्दाखेरी आजको मुख्य विषय १५गतेको घटना र संविधानको सुदृद्धीकरणका लागि यो संसद्ले ठोस पाइला चाल्नुपर्छ । ठोस आवाज उठाउनुपर्छ भन्ने हाम्रो भनाइ थियो । प्रतिपक्षले दिएन । यो दुःखद् हो । प्रधानमन्त्रीले उहाँहरुले उठाएको प्रश्नमा भोलि आएर जवाफ दिन्छु भन्दाभन्दै उहाँहरुले हाउस चल्न दिनुभएन । त्यो लोकतान्त्रिक चरित्र भएन,’– उनले भने ।
