काठमाडौं । प्रधानमन्त्री केपी शर्मा ओलीले गरिमामय संसद्मा आएर ‘राजतन्त्र व्युँताउँछु’ भन्नु संविधानसम्मत नहुने बताएका छन् । आज (सोमबार) राष्ट्रिय सभालाई सम्बोधन गर्दै उनले संसद्लाई संविधान र लोकतन्त्रको विरोध गर्ने थालो बनाउन नहुने बताएका हुन् ।
‘संसद् संविधानको विरोध गर्ने थालो होइन भन्ने कुरा म प्रष्ट गर्न चाहन्छु । संसद् लोकतन्त्रको विरोध गर्ने थलो होइन । संसद् जसले लोकतान्त्रिक प्रणालीलाई व्यवस्थित गर्या, गणतन्त्र घोषणा गर्यो, राजतन्त्रलाई विदा गर्यो । त्यो गरिमामय संसद्मा आएर फेरि राजतन्त्र व्युँताउँछु भन्ने कुरा, गणतन्त्रात्मक प्रणालीको विरोध गर्ने कुरा यो संसद्मा संविधानसम्मत हुँदैन,’– उनले भने ।
राष्ट्रिय प्रजातन्त्र पार्टी (राप्रपा) का नेताहरुले अवसर पाउँदा संविधान मान्छु भनेर यही व्यवस्थाको मन्त्री बनेको पनि स्मरण गराए । ‘सांसद् भएपछि कहिले–कहिले आफैं मन्त्री, उपप्रधानमन्त्री के–के भएर संविधान मान्छु भन्ने शपथ लिएर, इश्वरको नाममा शपथ लिएर, देश र जनताको नाममा शपथ लिएर आफैंले गरेको प्रतिज्ञा, आफैंले खाएको कशम पालना गर्नुपर्दैन । यो संविधानप्रति बफादार छु भन्ने शपथ पालना गर्नुपर्दैन ?’ प्रश्न गर्दै उनले भने ।
उनले गत शुक्रबार तीनकुनेमा भएको हिंसात्मक घटनाको मूल जिम्मेवार पूर्वराजा ज्ञानेन्द्र शाह रहेको पनि बताए ।
