मिनेसोटाको मिनियापोलिस नजिकैको उपनगर ब्रुकलिन पार्कमा शनिबार एउटा सानो विमान दुर्घटनाग्रस्त भएको छ । संघीय उड्डयन प्रशासन (एफएए) का अनुसार, सोकाटा टीबीएम-७ (SOCATA TBM7) विमान दिउँसो १२:२० बजे स्थानीय समयअनुसार एक आवासीय क्षेत्रमा खसेको हो ।
ब्रुकलिन पार्कका अग्नि नियन्त्रण प्रमुख शॉन कोनवेका अनुसार, दुर्घटनापछि विमानमा सवार कोही पनि जीवित नरहेको अनुमान गरिएको छ । तर, विमानमा कति जना सवार थिए भन्ने अझै स्पष्ट भइसकेको छैन ।
स्थानीय समाचार संस्था केटीएसपी (KTSP) का अनुसार, दुर्घटनास्थलमा ठूलो आगलागी भएको छ र कम्तीमा एक घरमा आगो लागेको छ । दमकलकर्मीहरूले आगो नियन्त्रणमा लिने प्रयास गरिरहेका छन् । दुर्घटनाग्रस्त घरमा बस्ने सबै व्यक्ति सुरक्षित रहेको जनाइएको छ ।
एफएएका अनुसार, उक्त विमान आयोवाको डेस मोइन अन्तर्राष्ट्रिय विमानस्थलबाट उडान भरेर मिनियापोलिसस्थित एनोका काउन्टी-ब्लेन विमानस्थलतर्फ गइरहेको थियो ।
मिनेसोटाका गभर्नर टिम वाल्जले सामाजिक सञ्जाल ‘एक्स’ मार्फत घटनाबारे जानकारी लिँदै आफू स्थानीय अधिकारीहरूसँग निरन्तर सम्पर्कमा रहेको बताएका छन् । ‘हाम्रो टोली घटनास्थलमा रहेका स्थानीय अधिकारीहरूसँग सम्पर्कमा छ र हामी अवस्थालाई नजिकबाट निगरानी गरिरहेका छौँ । उद्धारका लागि खटिएका सबै सुरक्षाकर्मीप्रति आभारी छु,’ उनले लेखेका छन् ।
दुर्घटनाको अनुसन्धान राष्ट्रिय यातायात सुरक्षा बोर्ड (NTSB) ले गर्नेछ । अनुसन्धानकर्ताहरू आइतबार घटनास्थलमा पुग्नेछन् र प्रारम्भिक अनुसन्धानपछि विमानलाई सुरक्षित स्थानमा सारेर विस्तृत अध्ययन गरिनेछ ।
