काठमाडौँ । सञ्चार तथा सूचना प्रविधिमन्त्री पृथ्वीसुब्बा गुरुङले संविधान संशोधनको कुरामा कुनै तलमाथि नहुने बताएका छन् ।
मन्त्रिपरिषद्को बैठकका निर्णय सार्वजनिक गर्न शुक्रबार आयोजित पत्रकार सम्मेलनमा मन्त्री गुरुङले काम गर्न बाधा पुगाइरहेका ११ वटा कानूनहरू संशोधनमा ल्याउने भनेर कानूनविद्हरू रहेको कार्यदल बनाएको भन्दै संविधान संशोधन हुने बताएका हुन् ।
उनले भने, ‘संविधान संशोधन हुन्छ, गरिन्छ, गर्ने हो । किनभने हाम्रो राजनीतिक सहमतिमा नै यही कुरा थियो । यसमा तलमाथि गर्ने कुनै पनि कुरा छैन ।’
उनले नीतिगत रूपले संविधान संशोधनको विपक्षमा नभएको भन्दै त्यसका लागि कार्यदल बनाएर अगाडि बढेको बताए ।
उनले भने, ‘नीतिगत रूपले हामी संविधान संशोधनको विपक्षमा होइन । अस्ति भर्खर दुई दलको आठ सदस्य उच्च राजनीतिक संयन्त्रले पनि निर्देशन दिएको छ । संविधान संशोधन गर्न, संघीयता र संविधान कार्यान्वयनको समस्या पहिलाउन, संसदमा अहिलेसम्म भइरहेको १९ वटा विधेयकहरू जुन बाँकी छन् त्यसलाई यही अधिवेशनबाट पारित गर्नको लागि के के गर्नु पर्छ भनेर कार्यदलहरू गठन भएको छ ।’
केन्द्रीय कमिटी बैठक समापनका क्रममा प्रधानमन्त्री केपी शर्मा ओलीले संविधान संशोधन २०८७ मा हुने बताएका थिए ।
