काठमाडौं । प्रहरीको नक्कली इन्स्पेक्टर बनेर युनिफर्म लगाएको फोटो देखाएर ठगीमा सक्रिय रहेका दुई जना पक्राउ परेका छन् ।
काठमाडौं उपत्यका अपराध अनुसन्धान कार्यालयले नक्कली प्रहरी परिचय पत्र, विशेष बढुवा सिफारिस सूची प्रकाशित गरिएको पत्र, प्रहरी निरीक्षकको युनिफर्म लगाएको फोटोसहित उनीहरूलाई पक्राउ गरेको हो । पक्राउ पर्नेमा सुदीप थापा र किशोर कुमार चौधरी छन् ।
उनीहरूले उच्च पदस्थ व्यक्तिहरुसँग सम्पर्क रहेको भनी प्रलोभनमा पारेर ठगी गरिरहेको प्रहरीले जनाएको छ ।
उनीहरूले वैदेशिक रोजगारको लागि क्यानडा, अष्ट्रेलिया लगायतका देशमा पठाइदिन्छु भन्दै विभिन्न व्यक्तिहरुलाई ठगी गरेको भन्ने उजुरीको आधारमा पुस २१ गते काठमाण्डौं कागेश्वरी मनोहरा नगरपालिका वडा नम्बर ७ पाचोकबाट उनीहरु पक्राउ परेका हुन् र चौधरी प्रहरी निरीक्षकको परिचय पत्र किर्ते गरी बनाउने कार्यमा संलग्न रहेका थिए । उनले कोटेश्वरमा मार्शल प्रिन्टिङ प्रेस संचालक हुन् ।
थापा र चौधरीलाई ठगी तथा लिखत सम्बन्धी कसूर मुद्दामा थप अनुसन्धानको लागि जिल्ला प्रहरी परिसर काठमाडौं पठाइएको प्रहरी उपरीक्षक काजीकुमार आचार्यले जनाएका छन् ।
