बीबीसी । अमेरिकाको लस एन्जलसको जङ्गलमा लागेको डढेलोमा परी पाँच जनाको मृत्यु भएको छ भने एक हजार भन्दाबढी घर जलेका छन् ।
लस एन्जलस काउन्टी फायर चीफ एन्थोनी मार्रोनका अनुसार डढेलो अहिले १० हजार ६०० एकड जमिनमा फैलिसकेको छ । डढेले धेरैतिर फैलिएकाले नियन्त्रणमा आउन सकेको छैन ।
क्यालिफोर्निया राज्यको लस एन्जलस क्षेत्रमा पर्ने प्यासिफिक प्यालिसेड्स भन्ने स्थानबाट मंगलबार बिहानदेखि डढेलो फैलिएको थियो ।
डढेलोका कारण ३० हजारभन्दा बढी व्यक्ति विस्थापित भएका छन् । विमान र दमकलहरूले आगो निभाउने प्रयास गरिरहेका छन् । तर सुक्खा अवस्था र १६० किलोमिटर प्रतिघण्टासम्मको तीव्र हावाले आगो अझ फैलाएको छ ।
