मुस्ताङ । मुस्ताङमा प्रहरीले करिव सात करोड मूल्य बराबरको अवैध सामानसहित तीन जनालाई पक्राउ गरेको छ ।
भन्सार प्रज्ञापनपत्र र बिल बिजक बिनाको ६ करोड ८१ लाख मूल्य बराबरको अवैध सामानसहित तीन जनालाई पक्राउ गरेको जिल्ला प्रहरी कार्यालय मुस्ताङले जनाएको छ ।
कोरोला नाकाबाट जोमसोम हुँदै बेनीतर्फ जाँदै गरेको ग १ ख ६९९९ नम्बरको ट्रकमा भन्सार प्रज्ञापनपत्र र बिल बिजकबिना अवैध रूपमा सामान ओसारपसार भएको हुन सक्ने भन्ने गोप्य सूचनाको आधारमा पुगेको प्रहरीले ट्रक चालक विष्णु थापा, ट्रकधनी घ्याचो गुरुङ र टसी आया गुरुङलाई पक्राउ गरिएको डीएसपी सूर्यबहादुर बोगटीले जानकारी दिएका छन् ।
उक्त ट्रकबाट ३३ प्रकारका सामान बरामद गरिएको छ । पक्राउ परेकाहरूलाई थप अनुसन्धान तथा आवश्यक कारबाहीका लागि राजश्व अनुसन्धान विभाग हरिहर भवन, ललितपुर पठाइएको डीएसपी बोगटीले बताए ।
