बीबीसी । गाजामा लडाइँ रोक्ने सहमतिलाई अन्तिम रूप दिन वार्ताकारहरूले कतारमा फेरि बैठक गर्न लागेका छन् ।
युद्धविराम गर्ने सहमतिका लागि इजरायल र हमास दुवै पक्ष सहमतिनजिकै पुगेको सङ्केतहरू प्राप्त भएका छन् । दुई पक्ष युद्धविराम र बन्धक मुक्तिका सर्तहरू टुङ्ग्याउने चरणमा पुगेको वार्ताबारे जानकार एक प्यालेस्टिनी अधिकारीले बीबीसीलाई बताएका छन् ।
गाजामा युद्ध सुरु भएपछि दुवै पक्षका प्रतिनिधिहरूले पहिलो पटक एउटै भवनमा भेट गरेको बुझिएको छ । अमेरिकी राष्ट्रपति जो बाइडनले सहमति सफल हुने ‘सँघारमा पुगेको’ र आफ्नो प्रशासनले तत्काल सम्झौता गराउन पहल गरिरहेको बताए ।
त्यसलगत्तै प्यालेस्टिनी पक्षले जारी वार्ताबारे जानकारी दिएको हो । इजरायली अधिकारीले पनि रोयटर्स समाचारसंस्थालाई वार्ता ‘निकै अगाडिको चरणमा’ पुगेको बताएका छन्। उनका अनुसार केही ‘घण्टा, दिन वा थप केही समयमा’ सम्झौता हुन सक्ने सम्भावना छ ।
अमेरिकी राष्ट्रपति जो बाइडनले आइतवार इजरेली प्रधानमन्त्री बेन्जमिन नेतन्याहू र सोमवार वार्ताको मध्यस्थता गरिरहेका कतारका अमिर शेख तमिम बिन हमाद अल–थानीसँग कुराकानी गरेका थिए ।
