ललितपुर । ललितपुर महानगर र मुस्ताङकोे घरपझोङ गाउँपालिकाबिच भगिनी सम्बन्ध कायम भएको छ। मुस्ताङ पुगेका ललितपुरका मेयर चिरीबाबु महर्जन र घरपझोङ गाउँपालिकाका अध्यक्ष मोहनसिंह लालचनले हालै आयोजित कार्यक्रममा समझदारी-पत्रमा हस्ताक्षर गरेका हुन्।
पूर्वाधार निर्माण, सामाजिक विकास, सम्पदा संरक्षण, पर्यटन प्रवर्द्धनका असल अभ्यास आदानप्रदान गर्न भगिनी सम्बन्ध कायम गरिएको हो। समझदारी-पत्रमा हस्ताक्षरपछि मेयर महर्जनले सम्पदा संरक्षण र अन्य आवश्यक क्षेत्रमा ललितपुर महानगरले सहयोग गर्ने बताए।
उनले भने, ‘प्रकृतिले यो पालिकालाई प्रशस्तै वरदान दिएको रहेछ, यसको संरक्षण गर्न हामी कुनै न कुनै रूपमा जोडिनेछौँ ।’ विनाटेन्डर महानगरले निर्माण गरेका मूर्त सम्पदा र सडक निर्माण घरपझोङले अनुसरण गर्न सक्ने उनले औँल्याए।
घरपझोङ गाउँपालिकाका अध्यक्ष मोहनसिंह लालचनले भगिनी सम्बन्धपछि आफूलाई अभिभावक पाएको महसुस भएको बताए। निमन्त्रणालाई स्वीकार गरेर मेयरसहितको प्रतिनिधिमण्डल पालिकामा आएकोमा खुसी व्यक्त गरे।
हिमालपारिको जिल्लामा गर्नुपर्ने काम प्रशस्तै भएको बताउँदै वार्षिक बजेट न्यून हुँदा काम गर्न असहज भएको बताए। उनले स्वास्थ्य शिक्षा, पूर्वाधार निर्माणमा गाउँपालिकाले गरेको कामको चर्चा गरे।
कार्यक्रममा घरपझोडकी उपाध्यक्ष जमुना थापामगरले घरपझोङ गाउँपालिका हिमालपारिको जिल्लाको पालिका भएकाले धेरै कुरामा पछि परेको र अब ललितपुर महानगरबाट धेरै कुरा सिक्न सक्ने बताइन्। उनले भनिन्, ‘हाम्रोमा गर्नुपर्ने काम धेरै छन्, देशभर नै नाम कहिलिए र अग्रणीे ललितपुर महानगरपालिकासँग सिकेर धेरै गर्नुछ।’
ललितपुर महानगरका प्रवक्ता एवं वडा नम्बर ९ का अध्यक्ष राजु महर्जनले घरपझोङ गाउँपालिका र ललितपुर महानगरको संस्कृति र सभ्यताबिच एकरूपता रहेको बताए। घरपझोङसहित पाँचवटा पालिकासँग महानगरले भगिनी सम्बन्ध कायम गरेको र भगिनी सम्बन्धले पालिकाबिच असल अभ्यास आदानप्रदान गर्न सजिलो हुने धारणा राखे।
ललितपुर महानगरका प्रमुख प्रशासकीय अधिकृत रेखादास श्रेष्ठले भगिनी सम्बन्ध कायम भएपछि धेरै ढोका खुलेको बताइन्। उनले भनिन्, ‘एक अर्काको विकासमा साझेदार हुन, एक अर्काको असल अभ्यासहरूको अनुकरण र अनुसरण गर्न अब धेरै सहज हुन्छ।’
