काठमाडौँ । नेकपा माओवादी केन्द्रले लेखा समिति सभापति ऋषिकेश पोखरेलको राजीनामा मागेको छ । सोमबार बसेको लेखा समिति सभापतिको बैठकमा माओवादी केन्द्रका सांसद अमनलाल मोदीले सभापति पोखरेलको राजीनामा मागेका हुन् ।
सहकारीमा परिवार जोडिएको र लेखा समितिको सभापति प्रमुख प्रतिपक्षीले पाउनु पर्ने भन्दै मोदीले उनको राजीनामा माग गरेका हुन् ।
सांसद मोदीले भने, ‘तपाईंमाथि सहकारीको विषय परिवारमा जोडिएको छ । प्रश्न उठेपछि यसको बारेमा तपाईंले जवाफ दिनुपर्छ । तपाईंले मार्ग प्रशस्त गरिदिए राम्रो हुन्छ ।’
उनले सार्वजनिक लेखा समितिलाई सरकारको छायाँ बनाइएको पनि आरोप लगाए । सभापति पोखरेलकी पत्नी अञ्जला कोइरालासहित २६ जनाविरुद्ध मोरङको धनपालथान गाउँपालिका–३ स्थित उमागौरी कृषि सहकारी संस्थाको रकम अपचलनमा संलग्न आरोपमा मुद्दा दायर गरिएको छ ।
