काठमाडौँ । दशौँ राष्ट्रिय खेलकुद आगामी चैत २३ देखि ३० गतेसम्म कर्णाली प्रदेशमा गर्ने निर्णय राखेप बोर्ड बैठकले गरेको छ।
यसअघि मंसिर २ गतेदेखि ९ गतेसम्म दशौँ राष्ट्रिय खेलकुद कर्णाली प्रदेशमा हुने तय भए पनि राखेपले कुनै जानकारी बेगर नै प्रतियोगिता तुहाएको थियो।
राष्ट्रिय खेलकुद परिषद् (राखेप) का अध्यक्ष युवा तथा खेलकुद मन्त्री तेजुलाल चौधरीको अध्यक्षतामा शुक्रबार बसेको ११८ औँ बोर्ड बैठकले दशौं राष्ट्रिय खेलकुदको नयाँ मिति घोषणा गरेको हो। राखेपका सदस्य सचिव टंकलाल घिसिङले दशौँ राष्ट्रिय खेलकुदको नयाँ मिति घोषणा गरेको बताए।
गण्डकी प्रदेशमा भएको नवौं राष्ट्रिय खेलकुदको समापनका दिन २०७९ साल कात्तिक २ गते बसेको राखेपको ११५ औँ बोर्ड बैठकले गत मंसिर २ देखि ९ सम्म कर्णाली प्रदेशमा दशौँ राष्ट्रिय खेलकुद गर्ने निर्णय गर्दै कर्णाली प्रदेशलाई झन्डा हस्तान्तरण गरेको थियो।
यसअघि मन्त्री चौधरीले फागुनमा दशौँ राष्ट्रिय खेलकुद गर्ने बताएका भए पनि अहिले चैत अन्त्यमा गर्ने गरी निर्णय भएको हो।
